| طول بالك يا ابو مِسِعد |
| البندقية الراكدة هيجيها يوم وتعند |
| وتشد الزند للعالي |
| ويكر عدانا طوالي |
| وتجيب النصر الغالي |
| طول بالك يا ابو مِسِعد |
| بكرة نلم العنقود |
| السايب المفرود |
| ونرجع المفقود |
| طول بالك يا ابو مِسِعد |
| عايزة طولة انفاس |
| عرّق الانطاع دساس |
| وما دام وياك الناس |
| مد الخطاوي وافرد |
| طول بالك يا ابو مِسِعد |
قصائد مروان سالم
قصائد الشاعر العربي مروان سالم في مكتبة قصائد العرب.
قصيدة القمر غاب الليلادي
| القمر غاب الليلادي وانطفى |
| الشبابيك اتسكرت والضجيج اختفى |
| الشح ملا حواصل الفلاحين وقت الطحين |
| والفقير محروم من النوم والدفا |
| النهاردة الليلة غبرة |
| ليلة النجم العفيف |
| اللى كان مولود شريف |
| واُغتصبوه بعد ما غاب الخريف |
| النهاردة العيد عيدين |
| الفقير ماسك رغيف على رصيف المقبرة |
| النهاردة الشمس… بتغني وتصدح |
| حق ولادي هيرجع |
| حق ولادي.. هيفرح لما تنطرني السما |
| النهاردة القمر ضياه… اخف من الشموع |
| الاغاني على وشوش الفقرا دموع |
| العيال في الحواري والنجوع حيرانين |
| النهاردة الليل مخيف |
| والبدر غايب من العيون |
| اتبعترت احلامنا من جوا السجون |
| الفقير حزنان وخايف |
| ليل بلادنا اعمى وشايف |
| النهاردة القمر فر من سكات |
| اتملت كل البيوت |
| بالدموع تارة …وتارة ابتسامات |
| السكارى صحيوا غنوا |
| اليتامى المحرومين |
| الارامل والحوامل على اعتاب السجون |
| في انتظار الضحكة اللي غايبة من سنين |
| السنين طالت وبارت |
| والفقير بردان وخايف |
| منتظر واعي وشايف |
| ساعة النور والخلاص |
قصيدة إلى بيرم
| الاولة اه |
| والتانية اه |
| والتالتة اه |
| الاولة اصلى على الهادى الموحد |
| والتانية امدح الشاعر العنيد وأمجّد |
| والتالتة مين يقول الشعر بعدك ويفند |
| الاولة اصلى على الهادى الموحد ، رسول العرب والعجم |
| والتانية امدح الشاعر العنيد وأمجّد ، من بعدك الشعر انهدم |
| والتالتة مين يقول الشعر بعدك ويفند ، الشعر بعده اتنفى واتردم |
| الاولة اصلى على الهادى الموحد رسول العرب والعجم محمد بن عبد الله |
| والتانية امدح الشاعر العنيد وأمجّد من بعدك الشعر انهدم وهجرناه |
| والتالتة مين يقول الشعر بعدك ويفند الشعر بعده اتنفى واتردم وياه |
| الاولة اه |
| والتانية اه |
| والتالتة اه |
قصيدة متنتظرش الموت
| الموت له ابواب |
| وله بحور وسحاب |
| راح يسحبك في سكوت |
| متنتظرش الموت |
| اتفتحت ابواب السماء بالاندهاش |
| مين دا اللى مات ولسه مجاش |
| مين اللي مستني ومين موعاش |
| ارمي حملك وفوت على كل البيوت |
| هيحزنوا في سكوت وميرقعوش بالصوت |
| راح يسحبك في سكوت |
| متنتظرش الموت |
| متنتظرش الارض الخضرة والحلم السعيد |
| الحقلك تذكرة واهرب غريق أو شهيد |
| ايه اللي مستنيه أو لسه هاتجنيه |
| مكنش اللطم راح تكون زغاريد |
| راح يسحبك في سكوت |
| متنتظرش الموت |
| أمام المدينة كل فليسوف محتار |
| ومنتظرش الموعد المختار |
| وفات بدون حذر ودون تهديد |
| كان من الأشرار او الأخيار |
| راح يسحبك في سكوت |
| متنتظرش الموت |
| راح يدبحوك في السوق |
| او راح تموت مخنوق |
| راح يسلخوك |
| او ينهبوك |
| طب ليه تعيش مسروق |
| راح يسحبك في سكوت |
| متنتظرش الموت |
| هتعيش راضي خانع وذليل |
| إما تستمر مناوشة بقٌصر ديل |
| تزق عجلاتك وتفض بكراتك |
| وترضى بالمجالسة وهزة الخلاخيل |
| عجّل صعودك و كر فى التعجيل |
| راح يسحبك فى سكوت |
| متنتظرش الموت |
قصيدة الارض البدرية
| مشيت وحداني يوم مفزوع |
| وتوهني السكات والجوع |
| وكان يومها الكلام ممنوع |
| فى الارض البدرية |
| مشيت وحداني خالي الامل |
| مشيت فى حر ما يٌحتمل |
| مشيت ساكت بخنوع مٌكتمل |
| فى الارض البدرية |
| مشيت محني الرأس مهزوم |
| وكل الخلق دايرة تحوم |
| وناس جوعى وعبيد مختوم |
| وليل شاحب هواه مسموم |
| فى الارض البدرية |
| ومشيت وتني ماشي وماشي |
| خلايق متساقة غنم ومواشى |
| مشيت فى عتمة مبتتنحاشي |
| فى الارض البدرية |
| خطوة تجر رجل فى رجل |
| مازال القلب جوا السجن |
| ولسه الامل مفقود |
| ولسه السجن بباب مصفود |
| شراع الحق جوا السجن |
| وسيف العدل لازال موؤد |
| في الارض البدرية |
قصيدة ابن الوادي الاخضر
| ابن الوادي الأخضر |
| نبات طارح هزيل دبلان |
| يلعب وياك حزر فزر |
| وانت المسكين خلصان |
| ♣️♣️♣️♣️♣️♣️ |
| عينى عليك يا ضناي |
| محبوس فى الجنة او ممسوك |
| الحكم كاويك يا مملوك |
| والنيل مخنوق مستني تفوق |
| وانت مسكين خايف مخنوق |
| عينى عليك |
| ♣️♣️♣️♣️♣️♣️ |
| الحكم لصاحب الحكم |
| والارض لصاحب الملك |
| بكرة الميعاد نلم الولاد |
| نلضم ونهتف فى البلاد |
| نملا البراح |
| بنور الصباح |
| ♣️♣️♣️♣️♣️♣️ |
| بكرة نناديك يا عرق الشقا |
| يا عامل هتعمل |
| يا فلاح هتزرع |
| يا ورد الجناين |
| هتطرح وتفرع |
| ويصدح وادينا |
| مين هيعادينا |
| ساعة الحصاد |
| ساعة الاغاني |
| وضم الفؤاد لكل الولاد |