| كلٍّ مشى بالدرب همّه يهمّه | مثل البشر يا هم فيني تهمّي |
| أحدٍ وصله الرزق لا حد فمّه | واحدٍ على عسرٍ وضيقٍ ونشمي |
| واحدٍ ترك أمه تناديه ، يمّه | ماتت تحرّى منه : لبيه أمي |
| واحدٍ غصب مربوط بيته بعمه | واحدٍ حرام يقول في بيت عمّي |
| واحدٍ نزل دمعه لأطراف كمّه | حتى دموع العين تذرف وتدمي |
| لو سج فكره .. لو تناسى وذمّه | الحب مو أعمى ترا الحب يعمي |
| الحب نعمه للمشاعر ونقمه | والقرب يروي بينما البعد يضمي |
| كم هو سبا المشتاق من نور .. عتمه | كم حوّل الذكرى غيومٍ تسمّي |
| كم من صدى صوتٍ ينادي بإسمه | رد للصدى يازين هالصوت وإسمي |
| كم مرةٍ شافه تسرّع وضمّه | وقفّل يدينه فاق من حلم وهمي |
| طب طب على قلبه وخلاه يمّه | ما كل ماتبغيه يازين تمّي |
| وجدي كما اللي غص في نص كلمه | متعشّقه بعيار خمسين وترمي |
| دمّي وسلاحه أو سلاحي و دمّه | ان صاب أو ادوش يادمّه يا دمّي |
| كلٍ مشى بالدرب همه يهمّه | مثل البشر يا هم فيني تهمّي |